【防蚊方法】人最大嘅敌人，原来唔係人，係蚊。因为唔少传染病都係由蚊传播开去，所以做定防蚊措施係有必要㗎！日本节目《マツコの知らない世界》请来咗一个超爱蚊嘅天才少年，经过自己独特嘅研究同实验，发现咗简单又有效嘅防蚊方法！
防蚊咬方法原来超简单！呢集《マツコの知らない世界》请来咗热爱蚊嘅18岁少年，田上大喜做嘉宾。田上喺4年前开始，用自己做饵去树林採捕野生嘅蚊，然后带返屋企放入「蚊房」做研究，屋企养咗近4,000只蚊！
用嚟饲养蚊嘅「蚊屋」係由田上自己用纸皮箱+胶樽自製，一箱大概有50～80只！
田上指，会吸血嘅只有交配后嘅雌性蚊，咁係为咗得到足够嘅营养产卵。所以除咗用蜜糖水餵蚊，佢甚至会「献血」畀蚊！完全係当成自己嘅仔女咁嚟养。
据调查所得，1年里面「杀人最多嘅生物」头5位，第1位竟然唔係人，係蚊！所以防蚊措施真係好需要㗎！
咁咩人会特别吸引蚊咬呢？曾经有过研究指，根据血型嘅唔同，受蚊「欢迎」嘅程度都唔同，O型最吸引蚊咬，而A型就相对地少蚊咬。但原来，血型唔係唯一原因！
田上经过研究同实验后，得出一个新原因，就係脚上细菌多嘅人，愈容易被蚊咬！
人类体内以及皮肤上有称为「常在菌」嘅细菌，顾名思义，就係经常存在喺人体内嘅菌，而呢啲菌嘅种类愈多，就愈惹蚊咬！
田上搵来妹妹・千笑一齐做实验，测试5分钟内2人各自被蚊咬咗几多挞！而结果係，妹妹脚上细菌比哥哥多近3倍，被蚊咬嘅次数达81次，而哥哥就只有25次！
虽然係做实验，但叫个妹去餵蚊都未免太惨！原来田上係一见到有蚊停留，就会扫走只蚊，并立即喺佢停留过嘅地方贴上红色贴纸做计算及记认。
于是田上就谂到，出街前用消毒杀菌湿纸巾抹脚，可以有效减少被蚊咬嘅次数！佢再叫来妹妹做实验，对比番杀菌前同杀菌后嘅被蚊咬次数，发现由81处，减至27处！总数减少至1/3！惹蚊嘅你，下次可以试下用呢个方法防蚊喇！
